Што да се јаде во жешките летни денови?

  06/01/2017 at 09:48 am

Летото е годишно време кое нетрпеливо го чекаме целата година, дел од нас заради годишните одмори а пак дел заради богатиот избор на овошје и зеленчук на зелените пазари како и во супермаркетите.

Што да се јаде во жешките летни денови?

Овој период изобилува со многу видови на овошје и зеленчук, период кој треба да го искористиме за нивна конзумација, воедно подобрувајќи си го своето здравје.

Препораката за летниот период од светски познати доктори како и нутриционисти е да се конзумира свежо овошје и зеленчук, каде што најдобро е тие да бидат сезонски и од домашно производство. Потрудете се да ги избегнете импортираните овошја и зеленчуци бидејќи најчесто тие се со непознат квалитет и содржат високо ниво на пестициди. Исто така, обидете се да ги избегнете производите кои содржат високо ниво на јаглехидрати (производи како тестенините), бидејќи резултатот е добро познат – вишок на килограми.  

Основното правило кое е веќе добропознато секое лето, е обилната конзумација на вода, и тоа ни помалку ни повеќе по 10 чаши во текот на еден ден. Исто така, иако времето е екстремно жешко, не е препорачливо да се пие многу ладна вода бидејќи нашиот организам доживува температурен шок со спротивните температури на водата и телото, каде што крвните садови се шират и се овозможува прекумерно ладење на телото кое може да резултира со шок. За оние кои боледуваат од срцеви како и бубрежни заболувања се препорачува конзумација на минерална вода во шише, со што се избегнува ризикот од зголемена концентрација на електролити, посебно натриумот. Газираните ладни пијалоци не се препорачуваат за овој период од годината, бидејќи покрај тоа што во себе тие содржат големо количество на шеќери, истовремено доведуваат и до зголемување на килограмите.​​​​​​​​​​​​

Што да се јаде во жешките летни денови?

Ограничете го и внесот на масти, каде што тој не треба да изнесува повеќе од 10% дневно. Јаглехидратите содржани во лебот и тестенините исто така обидете се да ги намалите, бидејќи со покачување на телесната топлина дигестивниот систем забавува со што резултатот повторно би бил вишок килограми.

Во летниот период исто така се препорачува и внес на поголемо количество на риба, бидејќи внесот на калории е помалк од оној доколку конзумирате месо, а воедно ги задоволувате потребите за протеини како и омега 3 масни киселини. Со конзумација на рибата еднаш до 2 пати неделно воедно го намалувате ризикот од разни болести, при што е докажано дека децата кој редовно внесуваат риба помалку заболуваат од бронхијална астма. Омега 3 масните киселини придонесуваат во здравјето на ткивото на мозокот и очната ретина, притоа намалувајќи го ризикот од мозочен удар за 22% кај луѓето кои еднаш неделно јадат риба, 27,5% помал ризик кај оние кој конзумираат 2 пати неделно и до 52% намален ризик кај оние кој конзумираат 5 пати неделно.  

Што да се јаде во жешките летни денови?

Покрај намалување на ризикот од мозочен удар исто така се намалува и ризикот од кардиоваскуларни и цереброваскуларни заболувања, се намалува нивото на масти во крвта и се зголемува “добриот” холестерол.

Доколку сте во можност обидете се да го распоредите внесот на храна на 5 до 6 мали оброци. Воедно избегнувајте ги силните зачини и ограничете го внесот на сол, кој заедно со поголемиот внес на вода во летото доведува до заддршка на водата и предизвикува чувство на надуеност кое воопшто не е пријатно.

Сладоледот е првото нешто кое не асоцира на лето. Како најсоодветно решение се препорачуваат готовите сладоледи кои се од светски познати брендови и кои се чуваат во специјализирани фрижидери, сè со цел избегнување на салмонелата која е присутна секое лето во слаткарниците.

Изборот на овошје и зеленчук во лето е огромен, па и вкусот на најпребирливите може да биде задоволен. Свежите салати од домати и краставици, или пак зелка со морков се идеални за жешките летни денови.

Што да се јаде во жешките летни денови?

Домат со средна големина содржи само 25 калории како и 3 грама природен шеќер, а воедно претставува одличен извор на витамин А и Ц. Овој зеленчук во себе содржи антиоксиданс ликопен кој ве заштитува од штетното влијание на УВ зраците како и предвременото стареење на кожата. Витаминот К и калциумот, двата минерали кои се есенцијални за цврстината на коските, се содржани токму во доматите.   

Краставицата пак иако во последниве години ја имаме постојано во текот на годината, како најсвежа и највкусна можеме да ја конзумираме во летниот период. Составот од 96% проценти вода е вистинско освежување за нашето тело во жешките денови, со што можноста за дехидратација е исклучена. Иако најголемиот процент од краставицата е вода, таа во себе содржи минерали и витамини неопходни за нашиот организам. Таа е богата со витамин К, бакар, магнезиум, витамин Ц и манган, а воедно содржи и полифеноли кои се значајна компонента за намалување на ризикот од хронични болести. Сигурно не сте знаеле дека со отсекување на една резанка краставица и нејзино поставување во устата ги уништувате бактериите кои го предизвикуваат лошиот здив, овозможувајќи ви свеж здив во текот на целиот ден.   

Салата која сите ја подготвуваме во нашите домови е македонската салата, за која не е потребен рецепт бидејќи сите знаеме како едноставно и за краток период да ја подготвиме (неколку домати, краставица, младо кромитче, печена пиперка). Доколку сакате во салатата да биде присутен вкусот и на сирењето тогаш подгответе шопска или пак грчка каде ги додавате маслинките за збогатување на веќе одличниот вкус на свежите зеленчуци. Обидете се во сите салати да зачините со маслиново масло кое е ладно цедено, бидејќи е многу поздраво отколку сончогледово.

Што да се јаде во жешките летни денови?

За морковите е познато дека содржат високо количество на бета-каротен, со што заштитуваат од очни заболувања. Тие исто така превенираат од срцеви заболувања, го редуцираат и регулираат високиот крвен притисок. Летото е период кога можете да ги конзумирате свежи и млади во салати, сокови или пак сирови.

Покрај свежите зеленчукови салати, во летото се присутни голем број на овошја со кој можете да приготвите буквално сè, од сокови, ледени чаеви, освежувачки коктели, овошни салати па се до овошни торти.

Лубеницата, црешите, јагодите, кајсиите и праските се само дел од палетата на овошја кои се достапни во лето.   

Лубеницата е овошје кое содржи голем процент на вода, дури 92%. Но ова освежувачко овошје покрај тоа што воглавно составено од вода, во себе содржи и голем број на нутритиенти. Во секој сочен залак лубеница содржано е високо ниво на витамин А, Б6 и витамин Ц, голем број на антиоксиданти и амино киселини. Оваа летна закуска има во себе само 40 калории, а притоа не содржи ниту еден процент масти. Научниците забележале дека во лубеницата се наоѓа големо количество на ликопен, нутритиент кој е ефективен во заштита на телото. За оние кој внимаваат на својот изглед, лубеницата содржи витамин А каде што со конзумација на само 100 грама лубеница, препорачаниот дневен внес на овој витамин е задоволен за ¼. Витаминот А ја хидрира кожата и косата, а воедно го стимулира растот на нови келии на колаген и еластин. Бидејќи лубеницата во себе содржи високо количество на калиум, луѓето кои имаат висока концентрација на калиум во крвотокот (хиперкалемија) препорачливо е да ја конзумираат во ограничено количество, односно за нив е дозволено само 100 грама лубеница.

Како вистинско летно освежување ви препорачуваме да го подготвите свежиот сок од лубеница, при што ќе бидете разладени и воедно ќе ги внесете сите овие хранливи состојки во својот организам.

Сок од лубеница

Потребни состојки:

  • 1 лубеница исчистена од семки и кора (околу 2 килограми)
  • 2 лажички мелен ѓумбир
  • 2 лажички лимонов сок
  • Листови свежо нане (за сервирање)
  • Коцки мраз (за сервирање)

Начин на подготовка:

Парчињата лубеница заедно со ѓумбирот и лимоновиот сок ставете ги во блендер и изблендајте се додека не се воедначат состојките. Доколку сакате додадете шеќер.

Сокот префрлете го во бокал за сервирање, додадете ги ливчињата нане и коцките мраз и сервирајте веднаш.

Што да се јаде во жешките летни денови?

Кајсиите се одличен извор на витамин А и исто така извор на витамин Ц, растителни влакна и калиум. Ова овошје содржи само 17 калории во себе, со што се вбројува во едно од најмалку калоричните овошја. Не секогаш знаеме како да ги одбереме вистинските кајсии, па така доколку се двоумите секогаш изберете ги оние кои имаат интензивна портокалова боја и кој на допир се малку меки, а не оние кои се жолти или пак зелени и воедно тврди. Ова овошје покрај тоа што се конзумира сирово, тоа многу често е и додаток на месото давајќи му свежина и благо - кисел вкус.

Луто телешко со кајсии

Потребни состојки:

  • 100 мл суво бело вино
  • 2 лажички алкохолен оцет
  • 1 лажичка мелен свеж ѓумбир
  • 1 лажичка ким
  • ¼ лажичка цимет
  • Сол и црн бибер
  • 1 чешне лук
  • 4 моркови
  • 100 грама кајсии
  • 50 грама зелени маслинки
  • 1,5 килограм телешко месо без коска
  • 1 врзопче коријандер

Што да се јаде во жешките летни денови?

Извор: www.berriesandspice.com

Начин на подготовка:

Во сад за бавно готвење додадете ги виното, оцетот, ѓумбирот, кимот, циметот, ¼ шолја вода, ½ лажичка сол и ¼ лажичка црн пипер.

Додадете го лукот, морковите, кајсиите и маслинките и измешајте. Додадете го месото во мешавината во тавата и гответе 6 до 7 часа на оган со ниска температура.

Сервирајте го месото со ориз или пак пире и уживајте во прекрасниот вкус на пикантното телешко со кајсии.  

Постојат безброј комбинации на овошја кои воедно се одлични летни освежувања. Дозволете си ја слободата и и комбинирајте ги овошјата по свој вкус, а нашиот предлог за овошна салата е следен:

Мохито овошна салата

Подгответе го овој рецепт за помалку од 1 минута, каде што иако името асоцира на алкохолниот коктел, салатата е без додаток на алкохол со што се овозможува да ја конзумираат сите возрасти. Доколку пак ја подготвувате за забава со вашите пријатели, додадете малку рум за да ги “размрдате“ вкусовите.

Мохитото е одлично за конзумација во текот на целата година, бидејќи комбинацијата на нане и лимета е едноставно освежувачко и прекрасно. Во оваа салата со додавање на разни сезонски овошја како јагоди, цреши, лубеница го збогатувате веќе прекрасниот вкус и добивате освежувачка овошна салата.

Најлесната овошна салата на светот ја подготвувате со 500 грама свежа лубеница, која е исечена на коцки и од неа се отстранети семките. Потоа додадете јагоди, кајсии, праски (сезонско овожје кое го имате во својот дом) и на крај мохито состојките – нане и лимонов сок или сок од лимета. Сокот од лимон можете да го засладите со шеќер во прав и да го прелиете врз салатата.

Оставете ја салатата во фрижидер 10 до 15 минути за да се впијат вкусовите од овошјето и сервирајте.

Што да се јаде во жешките летни денови?

Извор: www.iowagirleats.com

Сигурно имате многу рецепти во својот дом за подготовка на летни напитоци или пак свежи овошни и зеленчукови салати. Се надевам ве инспириравме да подготвите некоја од нив истакнувајќи ги нутритивните факти на дел од овошјето или зеленчукот, па на вас преостанува да започнете со нивна подготовка и едноставно да уживате во летото кое полека пристигнува.

Од Рептил